დულოქსეტინის პოლაროგრაფიული ანალიზი

ანოტაცია

მენტალური ჯანმრთელობა პიროვნების საზოგადოებაში ინტეგრირების ერთ-ერთი მნიშვნელოვანი ფაქტორია, თუმცა არსებობს ამ ტერმინის საპირისპირო ცნება- ,,მენტალური აშლილობა”. ფსიქიკური აშლილობისას ადამიანს არ შეუძლია პრობლემებთან გამკლავება და ცხოვრებისეულ პირობებთან ადაპტირება. დღევანდელი მიდგომა ფსიქიკური აშლილობის მკურნალობისადმი კი გულისხმობს ფსიქოტროპული პრეპარატების გამოყენებას და, ამავდროულად, სოციალურ და ფსიქოლოგიურ ჩარევას. კვლევის მიზანს წარმოადგენდა ფსიქოტროპული საშუალების - დულოქსეტინის ელექტროქიმიური მახასიათებლების შესწავლა და ანალიზის ოპტიმალური პირობების შერჩევა. ქიმიურ-ტოქსიკოლოგიური თვალსაზრისით, დულოქსეტინი არის ძალიან საინტერესო პრეპარატი. მისი გამოყენების ინსტრუქციაში პირდაპირ წერია, რომ პრეპარატით მკურნალობის დროს აუცილებელია ოჯახის წევრის მეთვალყურეობა, ვინაიდან პრეპარატის გვერდითი ეფექტია სუიციდური იდეების პროვოცირება. ჩატარებული კვლევის საფუძველზე დადგენილი იქნა, რომ დულოქსეტინის ჰიდროქლორიდი პოლაროგრაფიულად აქტიური ნივთიერებაა 0.5 M NaClO₄-ის ფონზე წყალხსნარებსა და ეთილის სპირტის ხსნარებში. ის ორივე გამხსნელში იძლევა ერთტალღიან დიფუზური ხასიათის მრუდებს. ასევე განისაზღვრა კონცენტრაციის ფარგლები, სადაც პროცესი არის სწორხაზოვანი დულოქსეტინისა (c=1.12´10-4 - 8.4´10-4 მოლი/ლ (წყალში) და c=6.54´10-4 - 7.19´10-3 მოლი/ლ (ეთილის სპირტში). დადგინდა, რომ დულოქსეტინის ჰიდროქლორიდის რაოდენობრივი განსაზღვრის მიზნით შესაძლებელია, როგორც წყლიანი, ისე სპირტიანი ხსნარების გამოყენება, ვინაიდან პროცესი ორივე არეში სწორხაზოვანია: 0.5 M NaClO₄-ის წყალიან არეში საკალიბრო მრუდის სწორხაზოვნება არის R₂=0.9926, ხოლო სპირტიან არეში - R₂=0.971. წყლიანი ხსნარის სწორხაზოვნება საკმაოდ მაღალია და, შესაბამისად, შესაძლებელია მისი ეფექტური გამოყენება დულოქსეტინის როგორც ქიმიურ-ტოქსიკოლოგიური, ისე ფარმაკოკინეტიკური კვლევების დროს, რაოდენობრივი ანალიზისთვის.