Al. Kipshidze - About Georgian-Russian and Georgian-Armenian relations

ანოტაცია

    ალექსანდრე ყიფშიძე ცნობილი ქართველი ისტორიკოსი, პუბლიცისტი, საზოგადო და პოლიტიკური მოღვაწე იყო. მან პუბლიცისტური საქმიანობა ჯერ კიდევ სემინარიაში ყოფნის დროს დაიწყო, აქვეყნებდა კორესპონდენციებს გაზეთ „დროებაში“. მოგვიანებით თანამშრომლობდა სხვადასხვა ჟურნალ-გაზეთებში:  „ცნობის ფურცელში“, „მეგობარში“, „ისარში“, „მოამბეში“, „ერსა“ და „ივერიაში“.  იგი  იყო ჟურნალ „კლდისა“ და გაზეთ „საქართველოს“ ერთ-ერთი დამფუძნებელი და რედკოლეგიის წევრი.

    ალექსანდრე ყიფშიძე სისტემატურად წერდა საქართველოში არსებული მდგომარეობის შესახებ. იგი, როგორც ისტორიკოსი კარგ ცოდნას ამჟღავნებდა არა მარტო საქართველოს ისტორიის, არამედ ევროპის ქვეყნების ისტორიის მიმართაც. პუბლიკაციებში საუბრობდა ეკონომიური ცხოვრების, ეთნოგრაფიის, კულტურის, ლიტერატურის  საკითხებზე. თითოეულ საკითხზე  მოჰყავდა სათანადო არგუმენტები, შესაბამის დასკვნებს აკეთებდა და ამომწურავ  პასუხს იძლეოდა იმაზე, თუ რა არის იმისათვის აუცილებელი, რომ ერთ მუშტად შეიკრას ერი  და გაუმჯობესდეს ცხოვრების პირობები.  

    პუბლიცისტი ყურადღებას ამახვილებდა   ქართველი და სომეხი ხალხების ურთიერთობებზე, იგი წერდა, რომ ყველა სომეხს მოღალატეობას ვერ დასწამებდით, ყველანი როდი იყვნენ რუსი მოხელეების ერთგულნი.

ალ.ყიფშიძე საუბრობდა  ყველა იმ მეცნიერის შესახებ, რომელიც ცდილობდა გაეყალბებინა საქართველოს წარსული, მისი ისტორია და თავისი მოსაზრებებით დაეკნინებინა ქართველი ხალხი.