ნარჩენების მართვის გამოწვევები და შესაძლებლობები იმერეთის ტურისტულ დესტინაციებში

ტურიზმი მნიშვნელოვან როლს ასრულებს გლობალურ ეკონომიკაში, ქმნის შემოსავლისა და დასაქმების ახალ შესაძლებლობებს. თუმცა, მისი ზეგავლენა გარემოზე, განსაკუთრებით ნარჩენების წარმოქმნის თვალსაზრისით, მზარდად ზრდის საერთაშორისო შეშფოთებას. კვლევების მიხედვით, ტურიზმი ევროპაში წარმოქმნილი ნარჩენების დაახლოებით 6.7%-ს შეადგენს, რაც სერიოზული გარემოსდაცვითი, სოციალური და ეკონომიკური გამოწვევების წინ გვაყენებს.

იმერეთის რეგიონი, საქართველოს დასავლეთ ნაწილში მდებარე ერთ-ერთი ტურისტულად ყველაზე აქტიური და მდიდარი რეგიონია, რომელიც გამოირჩევა უნიკალური ბუნებრივი და კულტურული რესურსებით. თუმცა, ტურიზმის ზრდასთან ერთად რეგიონში სერიოზული პრობლემები წარმოიშვა ნარჩენების მართვის თვალსაზრისით.

წინამდებარე კვლევა განიხილავს ნარჩენების მართვის გამოწვევებს იმერეთის ტურისტულ დესტინაციებში, აანალიზებს არსებული პრაქტიკებს და სთავაზობს რეკომენდაციებს მდგრადი ტურიზმის განვითარებისათვის. კვლევის ფარგლებში ჩატარდა გამოკითხვები და დაკვირვებები ტურიზმთან დაკავშირებულ ობიექტებში, როგორიცაა სასტუმროები, საოჯახო ღვინის მარნები, კულტურული ტურიზმის ლოკაციები და დაცული ტერიტორიები.

მდგრადი ნარჩენების მართვა მოითხოვს მრავალდონიან სტრატეგიას, რომელიც აერთიანებს სამთავრობო პოლიტიკას, კერძო სექტორის აქტიურ ჩართულობასა და საზოგადოებრივი ცნობიერების ამაღლების ინიციატივებს. კვლევა ხაზს უსვამს ნარჩენების სეპარაციის, გადამუშავების, კომპოსტირების და პასუხისმგებლიანი ტურისტული ქცევის მნიშვნელობას, როგორც გარემოზე ზემოქმედების შემცირების აუცილებელ პირობებს. ნარჩენების ეფექტური მართვა შესაძლებელია სტრატეგიული ინვესტიციების, ადგილობრივი საზოგადოების ჩართულობისა და მდგრადი ტურისტული პოლიტიკის მეშვეობით.