Giorgi Tavzishvili as a Theoretician of Georgian Pedagogy

ანოტაცია

XX საუკუნის 30-იან წლებში ჯერ კიდევ არ არსებობდა პედაგოგიკის მეთოდოლოგიის საკითხებზე შექმნილი რაიმე სახელმძღვანელო ქართულ ენაზე. ჩვენი პედაგოგიკური მეცნიერების ამ ხარვეზს რამდენადმე ავსებს 1933 წელს დაბეჭდილი გ.თავზიშვილის ნაშრომი „პედაგოგიკის მეთოდოლოგიური საფუძვლები“, სადაც თეზისების სახით იყო ჩამოყალიბებული ისეთი საკითხები, როგორებიცაა: პედაგოგიკის, როგორც მეცნიერების, განმარტება, მიზნები და ამოცანები; აღზრდა, როგორც სოციალური პროცესი და მისი მიზნები და ამოცანები, პედაგოგიკის სოციალური კანონზომიერება და ბიოლოგიური ფაქტორები. გიორგი თავზიშვილის პედაგოგიკურ მიდგომებში ბევრი რამ თანამედროვე თვალთახედვითაც უსათუოდ მისაღები და გასათვალისწინებელია. თუმცა მისი პედაგოგიური იდეების შეფასებისას უნდა აღინიშნოს, რომ სწავლა-აღზრდის პროცესის სასურველი ფორმით წარსამართად უნივერსალური ფორმულა არ არსებობს და ეს პროცესი მუდმივად იცვლება როგორც ისტორიული გამოცდილების საფუძველზე, ისე თანამედროვე მოთხოვნათა შესაბამისად. გიორგი თავზიშვილის პედაგოგიური ღვაწლის შეფასების დროს განსაკუთრებული ყურადღება უნდა მივაქციოთ იმ დამსახურებას, რომელიც მას ქართული პედაგოგიკის, როგორც მეცნიერების, ჩამოყალიბებისა და განვითარების პროცესში მიუძღვის. ამ თვალსაზრისით მას უაღრესად მნიშვნელოვანი როლი აქვს შესრულებული ქართულ ენაზე პედაგოგიკის სახელმძღვანელოს შექმნაში.