ლეონსიო პრადოს სამხედრო სასწავლებელი, როგორც პერუს მიკროკოსმოსი და მისი ძალადობრივი სამყარო, მარიო ვარგას ლიოსას რომანის „ქალაქი და ძაღლები” მიხედვით

ანოტაცია

მარიო ვარგას ლიოსას პირველ რომანში – „ქალაქი და ძაღლები“ (1963), ორი სივრცე – სასწავლებელი და ქალაქია აღწერილი. მოქმედება ლიმის მთავარ სამხედრო სასწავლებელში, ლეონსიო პრადოში მიმდინარეობს, რომელიც პერუს მიკროკოსმოსს წარმოადგენს. მეტაფორულ სასწავლო სივრცეში, პერუში მცხოვრები  ყველა სოციალური ფენის, რასისა და წარმომავლობის ადამიანი იყრის თავს. გაბატონებულია სამხედრო დისციპლინა, იგივე ფარისევლური, მაჩისტური და იერარქიული სამყარო, რომელიც ლიმაში დომინირებს.

 რომანი მიიჩნევა იმ მხატვრულ-ლიტერატურულ ტექსტად, სადაც ძალადობა მკვეთრად დომინირებს. ნაწარმოები არ განეკუთვნება რომანს დიქტატორის შესახებ. მიუხედავად იმისა, რომ დიქტატორი არაა რომანის მთავარი პერსონაჟი, ავტორი მკაფიოდ გვიჩვენებს დიქტატორული მმართველობის შედეგებს საზოგადოებასა და ინდივიდზე. სასტიკი, ძალადოვრივი რეალობა, ინდივიდის გადარჩენის აუცილებელ პირობაა. სურვილის მიუხედავად, რომანის მთავარ პერსონაჟებს, კადეტებს, გარემო ძალადობისკენ უბიძგებს. მწერალი გამოხატავს ისტორიულ და თანამედროვე პერუს რეალობას და გვიჩვენებს მოზარდობის პერიოდში მისი თვალით დანახულ პატივისცემას, დისციპლინასა და პატიოსნებას, აღწერს ისეთ ინსტიტუტებს როგორიცაა ოჯახი, პოლიტიკა და სამხედრო სისტემა. რომანში ნაჩვენებია იზოლაცია, კონფლიქტი და კონტრასტი სხვადასხვა სოციალურ ფენას შორის.

რომანში აღწერილი ძალადობა, ავტორის მოზარდობის პერიოდის პერუში არსებულ რეჟიმს ეხმიანება, ე. წ. ოდრიას „რვაწლედს“ (1948-1956), მანუელ აპოლინარიო რვაწლიან დიქტატორულ მმართველობას. რომანის შექმნის პერიოდში ავტორის მისწრაფება სოციალიზმისაკენ, თავისთავად გულისხმობდა კრიტიკულ დამოკიდებუ-ლებას დამკვიდრებული კონსერვატორული სისტემის მიმართ, რომელიც რეპრესიებით, ძალადობით, სოციალური და რასობრივი უთანასწორობითა და მაჩიზმით ხასიათდებო-და. ავტორი რომანში სწორედ ამ ძალადობრივ სამყაროს გვიჩვენებს, რომელიც გადამწყვეტ გავლენას ახდენს ინდივიდის ჩამოყალიბებაზე. სტატიაში გაანალიზებულია ლეონსიო პრადოს სამხედრო სასწავლებელი, როგორც პერუს მიკროკოსმოსი და აღწერილი და გაანალიზებულია რომანში გამოხატული ძალადობის ფორმები და მნიშვნელობა, რომელსაც ავტორი პირადი პროტესტის გამოსახატავად იყენებს.