ზედა ყბის ფრონტალური ლოკალიზაციის გიგანტური რადიკულური კისტები ცხვირისა და ჰაიმორის წიაღებში ზრდით

ანოტაცია

აღწერილია ცხვირისა და ჰაიმორის წიაღებში შეზრდილი, ზედა ყბის ფრონტალური ლოკალიზაციის გიგანტური რადიკულური კისტის იშვიათი კლინიკური შემთხვევა. პაციენტი 26 წლის, მამაკაცი, კლინიკაში მომართვისას უჩიოდა ტკივილს მარცხნივ ზედა ყბის არეში, საკბილე მორჩისა და თვალბუდის ქვედა მიდამოს რბილი ქსოვილების ანთებად შეშუპებას, ცხვირით სუნთქვის გაძნელებას. სახის ძვლების კომპიუტერული ტომოგრაფიით დაისვა დიაგნოზი: მარცხენა ზედა ყბის ძვლის გიგანტური რადიკულური კისტა ცხვირისა და ჰაიმორის წიაღებში ზრდით, გამწვავების ფაზა. კისტა იწვევდა შესაბამის მხარეს, მსხლისებური შესავლის ქვედა კედლის, ჰაიმორის წიაღის მედიალური და ქვედა კედლების მაგარი სასისა და საკბილე მორჩის ძვლოვანი ქსოვილის ვრცელი მასივის დესტრუქციას. ერთი მხრივ, ის განიცდიდა შეზრდას ცხვირში და ავიწროებდა ცხვირის მარცხენა ქვედა სავალის შიდა სივრცეს, მეორე მხრივ - ჰაიმორის წიაღში შეზრდის გამო ავსებდა მის ქვედა ნახევარს და, ამასთან, ვრცელდებოდა  ჰორიზონტალური მიმართულებით - ფრონტალური მიდამოდან მოლარების პროექციამდე, რის გამო, მასში ფიქსირდებოდა მარცხენა ზედა ყბის არეში არსებული ყველა კბილის ფესვი. წინასაოპერაციო მომზადების რეჟიმში პაციენტს დაენიშნა ანტიმიკრობული თერაპია. ამასთან, კბილების შენარჩუნების მიზნით, ოპერაციის წინ ჩაუტარდა ადრე ენდოდონტიურად ნამკურნალები 21, 22, 23, 25, 26 და 27 არხების განმეორებითი ენდოდონტიური მკურნალობა და დაბჟენა. პირველადი მომართვიდან 2 კვირაში პაციენტი ჰოსპიტალიზდა და ჩაუტარდა ოპერაცია: მარცხენა ზედა ყბის ძვლის სეგმენტური რეზექცია საღი ძვლის ფარგლებში, რადიკალური ცისტექტომია, 24 სტატიკადარღვეული კბილის ექსტრაქცია, 21, 22, 23, 25, 26 და 27 კბილების ფესვების მწვერვალების წაკვეთა, ოროანტრალური ფისტულის დახურვა.