Fraud or Breach of Obligation Arising from the Sale Agreement

ანოტაცია

ნასყიდობის ხელშეკრულებიდან წარმოშობილი ვალდებულებისა და თაღლითობის გამიჯვნა დღემდე აქტუალური და პრობლემური საკითხია. დროთა განმავლობაში, დანაშაულის ჩამდენი პირების მხრიდან იხვეწება დანაშაულის ჩადენის ხერხები, ჩნდება ახალი შემადგენლობები, რომელთა მეშვეობითაც ცდილობენ მოატყუონ სხვა ადამიანები და დაეუფლონ მათ საკუთრებას, რა დროსაც აქტიურად იყენებენ სამოქალაქო სამართლებრივ გარიგებებს.

პრაქტიკაში შესწავლილ იქნა არა ერთი საქმე, მათ გარკვეულ ნაწილზე გამოძიებაც არ იქნა დაწყებული იმ მიზეზით, რომ სახეზე იყო ნასყიდობის ხელშეკრულებიდან წარმოშობილი ვალდებულების დარღვევა და არა დანაშაული. აღნიშნული გადაწყვეტილების მისაღებად კი ყურადღება ექცეოდა მხოლოდ და მხოლოდ პოტენციური დაზარალებულის განცხადებისა და მასთან გასაუბრების შედეგად მიღებული ინფორმაციის იმ ნაწილს, სადაც აღწერილი გახლდათ სამოქალაქო სამართლებრივი გარიგების დადება. ყურადღებას არავინ ამახვილებდა დამნაშავის განზრახვაზე წინასწარ დაუფლებოდა სხვის ნივთს. ცხადია, რომ თითოეული საქმე ინდივიდუალურ მიდგომას საჭიროებს, მაგრამ თუნდაც ერთი ისეთი ადამიანის არსებობა, რომელსაც ზიანი მიადგა და რომელმაც განცხადებაზე პასუხად მიიღო, რომ მისი შემთხვევა არ შეიცავს სისხლის სამართლის კოდექსით გათვალისწინებული დანაშაულის ნიშნებს და წარმოადგენს სამოქალაქო დავის საქმეს, საკმარისია იმისთვის, რომ საზოგადოების გარკვეულ ნაწილს სამართალდამცავი ორგანოების მიმართ ნდობა შეუმცირდეს, რაც საბოლოოდ, უნდობლობასა და სხვა საქმეებში თანამშრომლობის სურვილის არქონას იწვევს, რაც საკმაოდ დიდ პრობლემებს ქმნის სისხლის სამართლის საქმის წარმოებაში.

ნაშრომში გაანალიზებულია თაღლითობისა და ნასყიდობის ხელშეკრულებიდან წარმოშობილი ვალდებულების დარღვევასთან დაკავშირებული, პრაქტიკაში არსებული პრობლემები. სტატიაში განხილულია ის მნიშვნელოვანი პირობები (გარემოებები), რაც გათვალისწინებულ უნდა იქნას ხელშეკრულებების შედგენისას. გარდა აღნიშნულისა, მიმოხილულია ის მნიშვნელოვანი ელემენტები, რომელთა გათვალისწინებაც აუცილებელია გარიგების გაფორმებისას.

სტატიაში ყურადღება ეთმობა თაღლითობისა და ნასყიდობის ხელშეკრულებიდან წარმოშობილი ვალდებულების დარღვევის გამიჯვნის პრობლემატიკას, როგორც თეორიული, ასევე პრაქტიკული თვალსაზრისით. განხილულია სტატისტიკური მონაცემები, რომელთა მოძიება და დამუშავება მოხდა სტატიაზე მუშაობის პროცესში.

თაღლითობისა და ნასყიდობის ხელშეკრულებიდან წარმოშობილი ვალდებულების დარღვევის გამიჯვნის პრობლემატიკა 21-ე საუკუნის მოთხოვნების შესაბამის განვითარებას და კანონმდებლობის მუდმივ სრულყოფას მოითხოვს სახელმწიფოს მხრიდან.