The process of making decision, focused on the best interests of minors, within the basis of multidisciplinary principle

ანოტაცია

მულტიდისციპლინური მიდგომა რამდენიმე ინსტიტუტის გამაერთიანებელი არასრულწლოვანთა უფლებების დამცველი ჯაჭვია, რომელთაგან თითოეული რგოლი მიმართულია  ბავშვთა  კეთილდღეობისაკენ. საქართველოში აღნიშნული უფლების რეალიზების სამართლებრივ გარანტიას წარმოადგენს საქართველოს კანონი ,,ბავშვის უფლებათა კოდექსი“, რომელიც 2019 წელს იქნა მიღებული. სწორედ ამ პერიოდიდან იწყება რადიკალური ცვლილებები  და დგინდება ბავშვთა უფლებების დაცვის მაღალი სტანდარტები, რომლის ძირითადი საყრდენი მულტიდისციპლინური პრინციპია. მიუხედავად ზემოაღნიშნულისა, მულტიდისციპლინური მიდგომით განხილული საქმე ავტომატურად არ ასოცირდება ბავშვისათვის  საუკეთესო  გადაწყვეტილების მიღების საფუძველთან. სასამართლო პრაქტიკა და სახალხო დამცველის ანგარიშები ცხადყოფს, რომ ხშირ შემთხვევაში სამოქალაქო სამართალწარმოების პროცესში ჩართული პირების, იქნება ეს ფსიქოლოგები, სოციალური მუშაკები თუ  ადვოკატები,  კომპეტენცია ვერ უზრუნველყოფს ბავშვთა საუკეთესო ინტერესების სათანადო დაცვას.  მართალია კანონმდებელი იმპერატიულად ადგენს მონაწილე პირთა სპეციალიზირებულობის ვალდებულებას, თუმცა აღნიშნული ნორმა  ბუნდოვანია, არ მიუთითებს მათი კომპეტენციის ზღვარს და არ განსაზღვრავს უწყებას, რომელიც პასუხისმგებელი იქნება მათ გადამზადებაზე. შესაბამისად გაურკვეველია როგორ უნდა შეაფასოს სასამართლომ ამ პირთა სპეციალიზაცია და რამდენად გასაზიარებელია მათ მიერ მომზადებული დასკვნები, რომლებიც არ არის შემუშავებული წინასწარ გაწერილი, ერთგვაროვანი და თანმიმდევრული მექანიზმებით და ეყრდნობა მხოლოდ საკუთარ გამოცდილებასა და პრაქტიკას. ზემოაღნიშნული პრობლემების აქტუალობის წარმოჩენის მიზნით ნაშრომში განხილული იქნება, როგორც ეროვნული ასევე  ადამიანის უფლებათა ევროპული სასამართლოს გადაწყვეტილებები, წარმოდგენილი იქნება რეკომენდაციები და დასკვნები, რომლებიც ხელს შეუწყობს სამოქალაქო სამართალწარმოების პროცესში, მულტიდისციპლინური მიდგომის საფუძველზე, არასრულწლოვანთა საუკეთესო ინტერესების დაცვაზე ორიენტირებული გადაწყვეტილების მიღებას.