სწავლების ორგანიზაცია და მეთოდიკა ქუთაისის სათავადაზნაურო გიმნაზიაში - „პედაგოგიური რჩევა“

ანოტაცია

ქუთაისის სათავადაზნაურო-საადგილმამულო ბანკის ინიციატივითა და ფინანსური დახმარებით 1880 წელს დაარსდა ქართული სათავადაზნაურო სკოლა-გიმნაზია. ქართული სასწავლო პროცესის განხორციელებისათვის აუცილებელი იყო ეროვნული სასწავლო პროგრამების, სახელმძღვანელოების და მეცნიერული ტერმინოლოგიის შექმნა. ეროვნული მისიის შესრულებას სწორი ორგანიზება და მართვა სჭირდებოდა. სკოლა-გინმაზიაში არსებულ სასწავლო სააღმზრდელო პროცესებს სამზრუნველო კომიტეტთან ერთად სათათბირო ორგანო „პედაგოგიური რჩევა” უძღვებოდა, რომელიც შედგებოდა სკოლის მასწავლებლებისაგან. აღნიშნულ სათათბირო ორგანოს ხელმძღვანელობდა გიმნაზიის ინსპექტორი. მის მიერ არჩეული მდივანი აწესრიგებდა „პედაგოგიური რჩევის ოქმებს“. სათათბირო ორგანოში შედიოდნენ სკოლა-გიმნაზიის პედაგოგთა კოლექტივის საუკეთესო წარმომადგენლები, რომლებმაც განსაკუთრებული წვლილი შეიტანეს ქართული სამეცნიერო ტერმინოლოგიის, ქართული სახელმძღვანელობის და ქართული პედაგოგიური აზროვნების განვითარების საქმეში. საარქივო მასალების შესწავლით ირკვევა, რომ „პედაგოგიურ რჩევას“, როგორც სათათბირო ორგანოს, მეთოდური ფუნქციაც ჰქონდა დაკისრებული. არსებული საარქივო დოკუმენტების ანალიზის შედეგად თამამად შეიძლება ითქვას, „პედაგოგიური რჩევა”იმ ეპოქისათვის დამახასიათებელი პრობლემების ფონზე წარმატებულად მართავდა დასავლეთ საქართველოში პირველ ქართულ საგანმანათლებლო დაწესებულებას. „პედაგოგიური რჩევა” პედაგოგიკის თანამედროვე პრინციპებზე აგებდა აღზრდისა და ქართულ ენაზე სწავლების ურთულეს საქმეს. დაარსების პირველი დღეებიდანვე ეროვნული სულისკვეთებით ზრდიდა მომავალ თაობას. მათი მიდგომა ყველა პრობლემური საკითხისადმი იყო შემოქმედებითი და გამოდიოდა მოსწავლეთა, მასწავლებელთა, სკოლის და ქვეყნის ინტერესებიდან.