Teacher Attitudes and Collaboration towards the Concept of Student-Centered Lesson

ანოტაცია

ბოლო ათწლეულების განმავლობაში მნიშვნელოვანი როლი შეიძინა მოსწავლეზე ორიენტირებულმა სწავლებამ. ტრადიციული, მასწავლებელზე ორიენტირებული სწავლების სტილიდან ახალ, მოსწავლეზე ორიენტირებული სასწავლო მიდგომების დანერგვაზე გადასვლა არც თუ ისე ადვილი პროცესია მასწავლებელთათვის. ამ მიზნით საქართველოში ხორციელდება რამდენიმე პროექტი, რომელთაგან აღსანიშნავია „მასწავლებელთა და სკოლის დირექტორთა პროფესიული განვითარების პროექტი“, რომელიც მიმდინარეობს „ათასწლეულის გამოწვევის ფონდი - საქართველოს“ მხარდაჭერით. ჩატარდა აღნიშნული პროექტისა და მასწავლებელთა პროფესიული განვითარების ცენტრის მიერ ორგანიზებული სხვადასხვა ტრენინგი. თუმცა, უნდა აღინიშნოს, რომ მხოლოდ ტრენინგზე დასწრება არ არის საკმარისი იმისათვის, რომ რეფორმა, რომელიც დღემდე მიმდინარეობს, იყოს ეფექტიანი და წარმატებული. ვფიქრობთ, მუდმივად უნდა მიმდინარეობდეს კვლევა და მონიტორინგი როგორც სხვადასხვა სამთავრობო, თუ არასამთავრობო ორგანიზაციის მხრიდან, ასევე, ლოკალურ (სასკოლო) დონეზე. ეს უკანასკნელი განსაკუთრებულად მნიშვნელოვანია, რადგან კვლევისა და მონიტორინგის მიზანი რეალური სიტუაციის შეფასებასა და არსებობის შემთხვევაში, პრობლემებისა და საჭიროებების გამოკვეთას ემსახურება კონკრეტულ სოციუმში, რაც ხელს შეუწყობს შესაბამისი ინტერვენციების დაგეგმვასა და განხორციელებას. ეს კი, საბოლოოდ ემსახურება სწავლა-სწავლების პროცესის გაუმჯობესებას და რეფორმის წარმატებით განხორციელებას თითოეული სკოლის დონეზე.