North Caucasus aborigine population in VII-IX centuries Adighe-Zikhes and different states of Dagestan

ანოტაცია

VI საუკუნის შემდეგ სულ მალე ადიღეებმა დაიკავეს შავი ზღვის სანაპირო, ტამანის ნახევარკუნძულის სამხრეთ-აღმოსავლეთით, სადაც იქამდე ბატონობდნენ გოთი-ტეტრაქსიტები. ეს დაკავშირებული იყო ადიღეური ტომების ზიხების გაძლიერებით, რომლებიც ცნობილნი შეიქმნენ ჩვ. წ. აღრიცხვის I საუკუნეში. თავდაპირველად ზიხები ითვლებოდნენ პატარა ტომებად, რომლებიც ცხოვრობდნენ თანამედროვე ქალაქებს - ტუაფსესა და გაგრას შორის. II საუკუნეში ზიხების ბელადმა სტახემფაკმა გამოაცხადა, რომ თავს თვლის რომის იმპერატორის ხელდებულად. ამ გარემოებას უნდა გამოეწვია სამეზობლოში მისი პოზიციების განმტკიცება. V საუკუნეში ზიხების ტერიტორია მნიშვნელოვნად გაიზარდა და გადაინაცვლა ჩრდილო-დასავლეთისკენ დაახლოებით ცემესის ყურემდე. VI საუკუნის ავტორი პროკოფი კემარიელი ტეტრაქსიტებს და „აბაზგებს“ შორის მოიხსენიებს მხოლოდ და მხოლოდ ზიხებს. VI საუკუნის შემდეგ ტეტრაქსიტები გაუჩინარდნენ ისტორიის ფურცლებიდან, ხოლო ზიხები პირიქით, ხდებიან უფრო და უფრო ცნობილები. თეოფანე, რომელიც ცხოვრობდა VIII საუკუნის დასასრულსა და IX საუკუნის დასაწყისში, იცნობდა „ზიქხეთს“, როგორც მნიშვნელოვან ქვეყანას  შავი ზღვის აღმოსავლეთ სანაპიროზე. მის სამხრეთ საზღვარზე მდინარე ნეჩეპსუხის პირზე მდებარეობდა იმ პერიოდისათვის ძალზე მნიშვნელოვანი ქალაქი ნიკოპსია.